Այսօր առավոտյան Երևանում մոտավորապես մեկ տասնյակ երիտասարդներ «Ոչ պատերազմին» կարգախոսով ակցիա են անցկացրել՝ «Ալիև դուշման, Պուտին враг, Սերժիկ թշնամի», «Խաղաղապահը զենք չի վաճառում», «Ոչ Ալիև, ոչ Սերժիկ, ոչ Պուտին» կարգախոսներով: Ես, լինելով կայքի խմբագիր, սկզբունքորեն որոշեցի, որ այդ ակցիան չենք լուսաբանելու, ու մի ներքին համոզվածություն ունեի, որ շատերը նման կերպ կվարվեն, բայց ի զարմանս ինձ՝ լրատվական դաշտի «կարկառուն» ներկայացուցիչների գերակշիռ մասը լուսաբանեց այն ամենայն մանրամասնությամբ: Լրագրող գործընկերներս, կարծում եմ, կարող էին, եթե ոչ չլուսաբանել, ապա գոնե ներկայացնել այնպես, որ թշնամին դրանից չառիթավորվեր: Այս պահին, երբ բոլորս գիտենք, թե սահմանում ինչ իրավիճակ է, կարծում եմ նման քայլերն անելու համար, մեղմ ասած, ճիշտ ժամանակ չեն ընտրել:
Հիմա ՀՀ յուրաքանչյուր գիտակից քաղաքացի, կարծում եմ, կհամաձայնի, որ սահմանում կանգնած ամեն մի զինվորի համար շատ կարևոր է մեր ներքին միասնությունը, իսկ «Սերժիկ թշնամի» կարգախոսով Երևանում ցույց անցկացնելը, դեմ է ՀՀ պետության շահերին և այս իրավիճակում համընկնում է Ադրբեջանի շահերին: Երթի կազմակերպիչները, նախքան այն կազմակերպելը, պետք է գիտակցեին, որ ադրբեջանական ԶԼՄ-ները առաջինն են անդրադառնալու այդ ակցիային ու այն տեսանկյունից են լուսաբանելու, որն իրենց է ձեռնտու, ինչն այդպես էլ եղավ՝ նրանք ներկայացրեցին այնպես, որ Հայաստանում ակցիա են անցկացնում սեփական իշխանությունների դեմ, քանի որ նրանք հրահրում են պատերազմական գործողությունների: Հետաքրքրիր է՝ ակցիայի կազմակերպիչները ոնց հաշվի չեն առել այս ամեն, այն էլ Սարգսյան-Ալիև հանդիպումից ընդամենը մի օր առաջ…
Կարծում եմ, սա այն պահն է, երբ պետք է մի կողմ թողնենք, թե Սերժ Սարգսյանն ինչպիսի ղեկավար է: Եթե մենք մեզ հաղթանակած ժողովուրդ ենք համարում, ապա պետք է կարողանանք մեր ներքին խնդիրները լուծել մեր երկրի ներսում, որ թշնամին դրանից չառիթավորվի: Հավատացեք պետությունն այս պահին ունի մեր աջակցության ու միասնականության կարիքը:
Էմմա Պալյան
Լուսանկարը՝ galatv.am-ի:
