Եվրոպական հանձնաժողովը երաշխավորել է Ալբանիային տրամադրել Եվրամիության անդամության թեկնածուի պաշտոնական կարգավիճակ: Այս մասին հաղորդել է ԵՄ-ի ընդլայնման ու հարևանության հարցերով հանձնակատար Շտեֆան Ֆյուլեն:
Ֆյուլեի խոսքերով՝ Ալբանիան կաշառակերության և կազմակերպված հանցավորության դեմ պայքարում նշանակալի հաջողությունների է հասել:
Ալբանիային Եվրամիության անդամության թեկնածուի պաշտոնական կարգավիճակ տրամադրելու որոշումը կարող է ընդունվել հունիսի վերջին կայանալիք ԵՄ-ի գագաթնաժողովի ժամանակ: ԵՄ-ը միանալու պաշտոնական դիմում Ալբանիան ներկայացրել էր դեռ 2009թ.-ին:
Անցյալ տարվա դեկտեմբերին ԵՄ-ի անդամ երկրները Ալբանիայի՝ բարեփոխումների ճանապարհին կատարած քայլերի գնահատման պահանջով դիմել էին Եվրոպական հանձնաժողովին :
