Աշխարհում սուրճի գինը շարունակում է բարձրանալ։ Բրազիլիայում երաշտի պատճառով սուրճի արաբիկա տեսակն ամենաարագն է թանկանում վերջին 10-ը տարվա գների համեմատ։
Բրազիլիան առաջատար է սուրճի արտահանման ծավալներով, այդ պատճառով ցանկացած եղանակային փոփոխություն կտրուկ ազդում է աշխարհում սուրճի գների վրա։ Արաբիկայի մարտին առաքվելիք ֆյուչերսային գները Նյու Յորքում աճել են 8.5 տոկոսով՝ հասնելով 1.3595 դոլարի՝ մեկ ֆունտի համար։ Սա ամենակտրուկ աճն է 2004 թվականի աշնանից հետո։
Ռոբուստա տեսակի սուրճը թանկացել է Լոնդոնում․ մեկ տոննայի գինն ավելացել է 3.4 տոկոսով՝ հասնելով 1839 դոլարի։
Մասնագետները նշում են, որ Բրազիլիայում նման երաշտ չի եղել դիտարկումների ամբողջ պատմության ընթացքում։ Նրանք կանխատեսում են, որ չոր եղանակը կպահպանվի մինչև ապրիլ ամիս։
