Ուկրաինական «ՈւԴԱՌ» կուսակցության նախագահ Վիտալի Կլիչկոն երեկ կեսգիշերից հետո երկրի նախագահ Վիկտոր Յանուկովիչի հետ բանակցությունների ավարտից հետո դիմել է ցուցարարներին՝ խնդրելով հրադադարը պահպանել մինչև շաբաթ օրը։
«Ես հրադադար եմ խնդրում։ Հրադադար եմ խնդրում մինչև վաղը։ Որպեսզի կարողանանք խուսափել արյունահեղությունից։ Հասկանում եմ, որ դա հեշտ չէ։ Մեր հիմնական խնդիրը նախագահի և կառավարության հրաժարականն է։ Սա առաջին փուլն է», — ասել է Կլիչկոն։
Երեկ, Յանուկովիչի հետ բանակցություններից հետո, արդարադատության նախարար Ելենա Լուկաշն ասել է, որ բանակցությունները կարող են շարունակվել հաջորդ օրը կամ երկու օրից։ Նա նշել է, որ բանակցությունների ընթացքում քննարկվել է բոլոր ձերբակալվածների ազատ արձակման հարցը, սակայն իշխանությունները պատրաստ են գնալ այդ քայլին միայն այն դեպքում, եթե ցուցարարներն ազատեն Գրուշևսկու փողոցը, որը գտնվում է ցուցարարների պաշարման տակ։
Եվրամայդանը երեկ քվեարկությամբ մերժել է իշխանությունների հետ բանակցությունների հնարավորությունը։
