Իրաքը մտադիր է մինչև 2020 թվականը երեք անգամ ավելացնել նավթի արդյունահանման ծավալները: Այս մասին հայտարարել է Էներգետիկայի հարցերով Իրաքի փոխվարչապետ Հուսեյն Ալ-Շահրիսթանին` ելույթ ունենալով «Մերձավոր Արևելքի էներգետիկ շուկան» թեմայով համաժողովին: Նրա խոսքերով, 2020 թվականին, արդյունահանումը ներկայիս 3 մլն բարելից կհասնի 9 մլն բարելի:
«Մենք հասկանում ենք, որ աշխարհը տնտեսական աճի կարիք ունի վառելիքի հաշվին», — ասել է փոխվարչապետը: Այս քայլով Իրաքը ցանկանում է թուլացնել Սաուդյան Արաբիայի դիրքերը նավթային շուկայում և սկսել ենթակառուցվածքների և տնտեսության վերականգնումը, որը գրեթե ամբողջութամբ ոչնչացվել էր պատերազմի հետևանքով:
Ավելին, իրաքցիները ցանկանում են աջակցել Իրանի նավթարդյունաբերական ոլորտին, ինչը թույլ կտա միասնական հանդես գալ Սաուդյան Արաբիայի դեմ: «Իրանը մշտական կապի մեջ է մեզ հետ: Նրանք ցանկանում են մասնակցել մեր առաջարկած մոդելի իրագործմանը», — ասել է Ալ-Շահրիսթանին:
Ներկայում Իրանն ու Իրաքը միասին օրական արդյունահանում են 12,5 մլն բարել նավթ:
