Վաղը ժամը 11:00-ին ՀՀ Վերաքննիչ դատարանում տեղի կունենա ազատամարտիկ Վոլոդյա Ավետիսյանի գործով դատական նիստը: Այս մասին Araratnews.am-ի հետ զրույցում ասաց Վոլոդյա Ավետիսյանի փաստաբան Արա Զաքարյանը:
«Կալանքը երկարացվել էր 2 ամսով եւ ես դա բողոքարկել եմ: Վաղը իմ բողոքն է լսվելու Վերաքննիչ դատարանում»,- ասաց Զաքարյանը:
Այն հարցին, թե ինչպես կարելի է մեկնաբանել Վոլոդյա Ավետիսյանի կալանքը անընդհատ երկարաձգելու վերաբերյալ միջնորդություն ներակայացնելը դատարան, Արա Զաքարյանը պատասխանեց.
«Փաստացի դուրս է գալիս՝ անելիքներ չունեն: Վոլոդյա Ավետիսյանի նկատմամբ քրեական հետապնդում է իրականացվում զուտ հայացքների համար: Որեւէ այլ տրամաբանական բացատրություն չկա: Դատարաններն էլ կուրորեն քննիչի միջնորդությունը երկարացնում ենˋ հաշվի չառնելով նույնիսկ Վճռաբեկ դատարանի տվյալ հարցի վերաբերյալ իրավական դիրքորոշումները»,- հավելում է Զաքարյանը:
Հիշեցնենք, որ Վոլոդյա Ավետիսյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով՝ խոշոր չափերի խարդախություն:
Լիլիթ Առաքելյան
