Տեղեկատվական անվտանգության փորձագետ Սավել Մարտիրոսյանն այսօր լրագրողների հետ հանդիպմանը, խոսելով հունվարի 20-ին ադրբեջանական հաքերների կողմից մի շարք հայկական կայքերի կոտրման փաստի մասին, ասաց, որ դա սեզոնային սրացում է, եւ Ադրբեջանի համար ստանդարտ օր է հարձակում գործելու համար:
«Նկատելի է, որ նախորդ օրերին հարձակումները զրոյացել էին, իրենք կուտակում էին կայքերը, որ հետո մեկ օրվա մեջ կոտրեն: Հունվար ամիսը ադրբեջանցիների համար կոչվում է սեւ հունվար: Հունվարի 20-ը այն օրն է, որ Խորհրդային բանակը մտավ Բաքու եւ զոհվեցին մի շարք ադրբեջանցիներ»,- ասում է Մարտիրոսյանը:
Նա կարծում է, որ առաջիկա շաբաթներին լուռ կլինի եւ ադրբեջանցիները կնախաապատրաստվեն իրենց հաջորդ օրացույցային հարձակմանը, որը կապված է Խոջալուի դեպքերի հետˋ փետրվարի 26-ից 28-ը:
«Այս գիշեր էլ հայկական հաքերներն են կոտրել ադրբեջանական կայքեր: Դա կապված է երեկվա ԼՂՀ սահմանին սերժանտ Արմեն Հովհաննիսյանի զոհվելու հետ, ում նկարը դրվել է այդ կոտրված կայքերի էջին»,- ասում է Մարտիրոսյանը:
Նա հավելում է, որ անցյալ տարի ավելի ուժեղ են եղել կիբեռ հարձակումներն ադրբեջանցիների կողմից: Անցյալ տարվա ընթացքում Ադրբեջանից հաքերների կողմից կոտրվել է շուրջ 300 կայք, իսկ հարձակումները հասել են հազարի: Իսկ այս տարի միայն հունվարին ադրբեջանական կողմից կոտրվել է 70 հայկական կայք:
«Կայքերի քանակը այդքան էլ կարեւոր չի, որակի հարցն է ավելի կարեւոր: Պարբերաբար թիրախ են դառնում ԼՂՀ պաշտոնական կայքերը: Որքանով ՀՀ պետական սեգմենտը պաշտպանված է, չեն կարողանում կպնեն, այդքանով շատ տխուր վիճակում է գտնվում ԼՂՀ պետական ցանցը: Այս անգամ էլ Արցախի 5 կայք են թիրախ դարձել»,- հավելում է Սամվել Մարտիրոսյանը:
Լրագրողների հետ հանդիպմանը ներկա «Ինտերնետ հանրություն» ՀԿ փոխնախագահ Գրիգոր Սաղյանը նշում է, որ անհրաժեշտ է հաշվի առնել այն բոլոր թերությունները, որոնք կայքերի անվտանգության հարցերի հետ կապված առկա են Հայաստանում:
«Սկսել է գործել ոչ պաշտոնական խումբ, որն առաջ է տանում կայքերի անվտանգության հետ կապված սեմինար, որպեսզի կայքերը ճիշտ կազմեն եւ այնպես անեն, որ հարձակումները քիչ լինեն»,- ասում է Սաղյանը:
Լիլիթ Առաքելյան
