Անօրինական որոշումներ, ճոխ ծախսեր. Տարոն Մարգարյանի գործունեության իրական պատկերը (տեսանյութ)

Մայիսի 14-ին Երեւանն ընտրելու է նոր քաղաքապետ: Քաղաքապետի աթոռի համար պայքարում են երեք քաղաքական ուժեր. ՀՀԿ-ն՝ գործող քաղաքապետ Տարոն Մարգարյանի, ԵԼՔ դաշինքը՝ ԱԺ պատգամավոր Նիկոլ Փաշինյանի  եւ  «Երկիր ծիրանի» կուսակցությունը՝ Զարուհի Փոստանջյանի գլխավորությամբ:

Տարոն Մարգարյանը Երևանի քաղաքապետի պաշտոնը զբաղեցնում է 2011 թվականի նոյեմբերի 15-ից՝ ընտրվելով Երևան քաղաքի ավագանու կողմից, փոխարինելով հրաժարական տված Կարեն Կարապետյանին: 2013 թվականին տեղի ունեցան քաղաքապետի ընտրություններ: ՀՀԿ-ի ցուցակը գլխավորում էր պարոն Տարոն Մարգարյանը՝ ընտրություններին մասնակցելով «Ավելի լավ Երեւան» կարգախոսով:

Այժմ այն մասին, թե ինչպես է ղեկավարել Տարոն Մարգարյանը Երեւանը, եւ ինչպիսին է եղել հասարակական կարծիքը նրա ընդունած մի շարք որոշումների վերաբերյալ:

2012 թվական. քաղաքային իշխանությունը որոշեց Մաշտոցի պուրակում կրպակներ տեղադրել: Բուտիկների տեղադրումը քաղաքացիական հասարակության ներկայացուցիչները համարեցին անօրինական՝ Տարոն Մարգարյանից պահանջելով անհապաղ դադարեցնել շինարարությունը:

Ամիսներ շարունակ ակտիվիստները պայքարեցին Մարգարյանի որոշման դեմ: Ի վերջո, հրապարակ ժամանեց Սերժ Սարգսյանը: Սիրուն չէ՝ դիմելով Երեւանի երիտասարդ քաղաքապետին նշեց նրա կուսակցության ղեկավարը: Մաշտոցի պուրակում կրպակներ չտեղադրվեցին:

Տարոն Մարգարյանի ղեկավարման տարիներին առավել հաճախ քննադատության տեղիք են տվել ճարտարապետական խնդիրները, մասնավորապես, հին շենքերի քանդման դեպքերը, որոնցից կարելի է առանձնացնել  Փակ շուկայի, Աֆրիկյանների տան, ինչպես նաեւ թիվ մեկ տպարանի շենքի քանդումը՝ պայթեցման եղանակով: Փակ շուկայի քանդումը քաղաքացիական հասարակության ներկայացուցիչները համարեցին անօրինական՝ օրեր շարունակ պայքարելով որոշման դեմ:

Փակ շուկայի տարածքը գնել էր գործարար պատգամավոր Սամվել Ալեքսանյանը: Լֆիկ Սամոն պատմամշակութային արժեք ներկայացնող կառույցը վերածեց «Երեւան սիթի» ցանցի հերթական սուպերմարքեթի, իսկ հանրային ընդվզումը հետզհետե մարեց:

Տարոն Մարգարյանը քաղաքացիների քննադատության թիրախում հաճախ է հայտնվել նաև տրանսպորտի չլուծված խնդիրների, տրանսպորտի ուղեվարձի բարձրացման դեմ բողոքի ակցիաների ընթացքում: 2013 թվականին տրանսպորտի սակագինը 150 դրամ դարձնելու Մարգարյանի օրինագիծն առաջացրեց հասարակական լուրջ դիմադրություն: Օրեր շարունակ Երեւանի փողոցներում, քաղաքապետարանի շենքի դիմաց բողոքի ակցիաներ էին, պահանջը նույնն էր՝ չեղյալ համարել անօրինական թանկացումը:

Բազմաթիվ ակցիաներ, տարաբնույթ միջոցառումներ, ֆլեշ մոբեր: Հասարակությունը հաղթեց Տարոն Մարգարյանին: Քաղաքապետարանը չեղյալ համարեց հասարակական տրանսպորտի սակագինը 150 դրամ դարձնելու որոշումը: Քաղաքացիական հասարակության ներկայացուցիչները տեղի ունեցածը համարեցին հաղթանակ գործող իշխանության նկատմամբ:

2013 թ.-ից ի վեր Տարոն Մարգարյանը քննադատության է արժանացել նաև Երևան քաղաքում աղբահանության ոլորտում տարիներ շարունակ առկա խնդիրների, ապօրինի ծառահատումների համար:

Մարգարյանը նաեւ ճոխ ծախսերի սիրահար է: Օրինակ՝ Երևանի քաղաքապետարանը 2014 թ. 20 միլիոն դրամի կոնյակ է  գնել, 400 հազար դրամանոց արծաթե բաժակներ նվիրել մայրաքաղաքի հյուրերին` Երեւանի տարիքը նշող՝ «Էրեբունի-Երևան 2796» խորհրդանշով:

Ընդ որում, սրանք քաղաքապետարանի գնած ամենաթանկ բաժակները չեն: Օրինակ՝ 2015 թ. հունիսի 5-ին «Ոսկե մարգարիտ» ՍՊԸ-ի հետ կնքված պայմանագրով կառույցը որպես հուշանվեր ձեռք է բերել կիսաթանկարժեք քարերով զարդարված 3 արծաթյա գավաթներ՝ վճարելով 1.302.000 դրամ (մեկ գավաթի գինը՝ 434 հազար դրամ): Իսկ դեկտեմբերի 2-ին նույն ՍՊԸ-ից գնել է մեկ արծաթյա գավաթ՝ կրկին կիսաթանկարժեք քարերով՝ վճարելով 470 հազար դրամ:

Քաղաքապետ աշխատելու տարիներին Մարգարյանը նաեւ գիտական թեզ պաշտպանեց: Նա այն կարգի էր խորացել գիտության ոլորտում, որ թեզի պաշտպանությունը որոշեց բոլորի աչքից հեռու իրականություն դարձնել: Իսկ մինչ Մարգարյանը գիտական թեզն էր պաշտպանում, իր թիմակիցներն ու որոշ ջահելներ լրագրողներից պաշտպանում էին նրա պաշտպանածը:

Տարոն Մարգարյանը նաեւ քննադատության է արժանացել բանակում չծառայելու համար: Թեև հաճախ է սիրում կամուֆլյաժ հագնել, այս կամ այն զորամաս այցելել եւ լուսանկարվել: Բանակում չի ծառայել, բայց հայրենիքին մատուցած ծառայությունների համար Մարգարյանը մեդալներով է պարգեւատրվել:

Այս ամենը Մարգարյանի գործունեության ընդամենը մի հատվածն էր:  Գործունեություն, որի ձեռագիրը այնքան նույնն է, որքան Հանրապետության հրապարակում ամեն տարի տեղադրվող տոնածառն ու երկաթյա շղթաները: Դրանք նույնն են, բայց քաղաքապետարանից հատկացվող գումարները տարբեր են:

 Փայլակ Ֆահրադյան