Այսօր ազատամարտիկներն անցկացրել են իրենց հերթական կլոր սեղանը քաղաքական ուժերի հետ միասին: Հանդիպման սկզբում ազատամարտիկ Սուրեն Սարգսյանը հայտարարեց այն մասին, որ իրենք նախատեսել էին իրենց Կլոր-սեղան քննարկումն անցկացնել Էրեբունի պլազա հյուրանոցում, բայց հանդիպումից ժամեր առաջ ազատամարտիկներին հրաժարվել են դահլիճ տրամադրել: «Այդ հյուրանոցը Քոչարյանինն է, ու այսօր իշանությունները հերթական անգամ ցույց տվեցին, թե ինչքան վախեցած են ու ողորմելի: Մենք մի պահ անգամ մտածեցինք մեր մյուս քննարկումներն անցկացնել Թիֆլիսում, որպեսզի իշխանությունները հասկական, թե իրենք ինչքան ողորմելի են, աշխարհին ցույց տանք՝ ինչքան ողորմելի են»,-նշել է Սուրեն Սարգսյանը: Վերջինս ներկայացրել է, որ հերթական Կլոր սեղանի նպատակը մեկն էˋներկայացնել ելքեր՝ ստեղծված իրավիճակից դուրս գալու համար: «Ժողովրդավարական հայրենիք» կուսակցության նախագահ Պետրոս Մակեյանը, ով ներկա է եղել քննարկմանը, ներկայացրել է հնարավոր ելքերի իր տարբերակները.«Մենք բոլորս քաջ գիտակցում ենք, որ գործող իշխանությունները չեն նպաստելու դրական որևէ քայլի: Ես կարծում եմ, որ ընդդիմությունը պետք է հրաժարվի իր ստանդարտ գործելաոճից, քանի որ փորձը ցույց է տվել, որ դա արդեն հուսախաբ է արել ՀՀ քաղաքացիներին, քանի որ ցանկացած կերպով իշխանությունները վերարտադրվում են: Մեզ պետք են քայլեր, որոնք իշխանությունների համար պարզ չեն լինի»,-նշել է Պետրոս Մակեյանը:
Էմմա Պալյան
