Թուրքիայի կողմից Սիրիայի հյուսիսում իրականացվող ռազմական գործողության հետ կապված՝ ԱՄՆ նախագահ Դոնալդ Թրամփը հայտարարել է, որ շուտով Թուրքիայի նկատմամբ պատժամիջոցներ կկիրառի: ԱՄՆ նախագահ Թրամփի Twitter-յան գրառումը փոխանցում է ermenihaber.am-ը:
Նա նշել է, որ հրամանագիր է ստորագրելու Թուրքիայից ԱՄՆ ներմուծվող պողպատի մաքսատուրքի դրույքաչափը 50%-ի հասցնելու մասին: Բացի դրանից՝ դադարեցվելու են ԱՄՆ առևտրի նախարարության և Թուրքիայի միջև իրականացվող 100 մլրդ դոլար արժողությամբ առևտրային գործարքի շուրջ բանակցությունները: Միջանկյալ նշենք, որ այժմ Թուրքիայից ԱՄՆ ներմուծվող պողպատի մաքսատուրքի դրույքաչափը 25% է: Այդ դրույքաչափը մինչև 2019 թ. մայիսը 50% էր, որը, կրկին Թրամփի որոշմամբ, նվազեցվել էր 25%-ի:
Սպիտակ տան ղեկավարը նաև հայտնել է Թուրքիայի որոշ բարձրաստիճան պաշտոնյաների նկատմամբ պատժամիջոցներ սահմանելու մասին:
