Սեպտեմբերի 29-ին ՀՀ 19 համայնքում տեղի են ունենում ՏԻՄ մարմինների ընտրություններ՝
12 համայնքի ղեկավարի,
6 ավագանու անդամների և
Խաշթառակ համայնքում և ավագանու անդամի, և համայնքի ղեկավարի ընտրություններ։
Անկախ դիտորդ հասարակական դաշինքը դիտարկում է իրականացնում բոլոր համայնքներում։
17 գյուղական համայնքում գործում է մեկ տեղամաս, Արտաշատ քաղաքի ավագանու քվեարկությունները տեղի են ունենում 12 տեղամասում, Փարաքար համայնքի ղեկավարի ընտրությունները՝ 4 տեղամասում։
Դիտարկված 19 տեղամասերից 5-ը գնահատվել է որպես անմատչելի, 2 տեղամաս ունեցել է թեքահարթակ, որոնցից մեկը, սակայն, փայտե էր և վնասված։ Եւս 4-ում տեղամասային կենտրոնի մուտքը հարթ է եղել։ Գետափ համայնքի տեղամասը տեղակայված է 2-րդ հարկում, իսկ մատչելիությունը որևէ կերպ ապահովված չէ։
Տեղամասերից 3-ում հանձնաժողովի նիստը սկսվել է էական ուշացումով, իսկ 2-ում ժամը 7:00-ից առաջ։
Գետափ համայնքում հանձնաժողովի քարտուղարը փորձել է արգելել դիտորդների մուտքը հանձնաժողովի նիստին։ Արագածոտնի մարզի երկու համայնքներում էլ հանձնաժողովի նիստը տեղի է ունեցել ընթացակարգային խախտումներով։ Նոր Կեսարիա և Գեղարքունիք համայնքներում հանձնաժողովի նախագահները ստիպված են եղել դուրս հրավիրել գտնվելու իրավունք չունեցող անձանց՝ թեկնածուներին և նույն թեկնածուի մեկից ավել վստահված անձանց։
Վանևան և Շղարշիկ համայնքներում տեղամասային ընտրական հանձնաժողովի նախագահները ամբողջությամբ չեն տիրապետում իրենց գործառույթներին, նախագահի գործառույթները մասամբ իրենց վրա են վերցնում այլ անդամները։
